TOCYNNAU AM Y CYNGERDD AGORIADOL YN GWERTHU’N
SYDYN
Mae’r tocynnau ar gyfer
cyngerdd agoriadol Eisteddfod Genedlaethol yr Urdd eleni yn
gwerthu’n sydyn. Mae trefnwyr yr Eisteddfod felly yn annog unrhyw un
sy’n bwriadu mynychu’r gyngerdd i archebu eu tocynnau’n fuan rhag
ofn iddynt gael eu siomi.
Cynhelir yr Eisteddfod yn
nhref Ruthun yn Sir Ddinbych rhwng 29 Mai a 3 Mehefin.
Mae’r gyngerdd agoriadol, a
gynhelir ym Mhafiliwn yr Eisteddfod ar faes yr Wyl ar dir Ysgol
Brynhyfryd a fferm Maes Llan yn Rhuthun, yn deyrnged i’r gantores a
chyfansoddwraig leol Caryl Parry Jones sydd wedi gwneud cyfraniad
enfawr i’r byd adloniant yng Nghymru dros y blynyddoedd. Cynhelir y
gyngerdd ar nos Sul, 28 Mai, am 7.00pm.
Bydd cast o sêr yn cymryd
rhan yn y gyngerdd gan gynnwys y tenor rhyngwladol Rhys Meirion, y
grwp poblogaidd, Eden, y ffefrynnau teledu Dewi Pws ac Emyr Wyn, y
canwr Dafydd Dafis, côr o ddisgyblion lleol ac aelodau o’r ysgolion
perfformio Anterliwt ac Ysgol Glanaethwy.
Meddai Cyfarwyddwr yr
Eisteddfod, Siân Eirian,
“Pa well ffordd o agor ein
Prifwyl na thrwy sicrhau gwledd i’r llygad ac i’r glust gan rai o
dalentau amlycaf Cymru, ac yn eu plith y tenor, Rhys Meirion. Mae
cyfraniad Caryl Parry Jones i fyd adloniant yng Nghymru ym
amhrisiadwy ac mae’r Urdd yn ymfalchio ein bod yn gallu llwyfannu
noson unigryw sy’n ddathliad o’i gwaith a’i chreadigrwydd.”
Bydd Caryl Parry Jones, a
fagwyd yn Ffynnongroyw rhwng Treffynnon a’r Rhyl, yn bresennol yn y
gyngerdd ac mae’n edrych ymlaen at y noson.
Meddai,
“Pan glywais am y gyngerdd
deyrnged ro’n i’n teimlo’n wylaidd iawn ac wrth fy modd i fod yn
onest. Dwi bob amser yn dweud fy mod i mor lwcus fy mod yn gwneud yr
hyn be dwi’n ei wneud. Dwi’n ennill fy mywoliaeth trwy wneud yr hyn
dwi’n ei garu orau yn y byd. Bydd teulu a ffrindiau yn y gyngerdd ac
rwy’n siwr y byddai’n teimlo’n eitha emosiynol.
“Mae Eisteddfod yr Urdd yn
rhoi hyder i bobol ifanc, a’r cyfle i werthfawrogi safon, a sut i
golli efo urddas.”
Cynhelir dwy sioe arall ar
lwyfan y Pafiliwn yn ystod wythnos yr Eisteddfod.
Cyflwynir Plas Du gan
ddisgyblion ysgolion uwchradd Sir Ddinbych. Cyfansoddwyd y sioe
gerdd hon gan Hywel Gwynfryn ac Robat Arwyn, ac fe’i lleolir mewn
plasty hynafol sy’n llawn ysbrydion a chyfrinachau. Byddwch yn barod
i gael eich dychryn! Ymysg y cast talentog mae hen ffrind i’r
Eisteddfod, Steffan Rhys Hughes, 12 oed, o Landyrnog, a ddaeth yn
amlwg yn gyntaf ar lwyfan Eisteddfod yr Urdd ac sydd bellach yn
wyneb cyfarwydd ar hyd a lled Cymru. Perfformir Plas Du nos Sadwrn,
27 Mai, am 7.00pm.
Bydd disgyblion ysgolion
cynradd y sir yn cyflwyno cynhyrchiad llawn cyffro am hynt a helynt
yr arwr Cymreig, Owain Glyndwr. Cynhelir Glyndwr nos Fawrth
30 Mai, a nos Fercher 31 Mai am 7.00pm.
Unwaith eto, y cyngor ar
gyfer y ddwy sioe gerdd yma yw, archebwch eich tocynnau’n fuan.
Gellir archebu tocynnau
trwy’r Linell Docynnau ar 0845 2571 639, neu trwy wefan yr urdd –
www.urdd.org
Gwybodaeth Ychwanegol:
Cysylltwch, os gwelwch yn
dda, â Manon Wyn, Swyddog Marchnata a Chysylltiadau Cyhoeddus, Urdd
Gobaith Cymru, Ffordd Llanbadarn, Aberystwyth, 01970 613115,
manonwyn@urdd.org
Nodyn i’r
Golygydd:
Eisteddfod
Genedlaethol yr Urdd yw’r wyl ieuenctid fwyaf yn Ewrop.
Bydd 40,000 o bobl ifanc yn cystadlu mewn amrywiaeth o gystadlaethau
gan gynnwys llefaru unigol, corau, dawns, celf a chrefft, cyfansoddi
a barddoniaeth.
Ar lwyfan yr Eisteddfod y gwnaeth sêr fel Bryn Terfel, Ioan Gruffudd,
Cerys Matthews, Aled Jones, Shân Cothi a Daniel Evans fwrw eu
prentisiaeth.
Mae’r Eisteddfod yn denu dros 100,000 o ymwelwyr, 15,000 o
gystadleuwyr a bron i filiwn o wylwyr teledu.
Mae’r Eisteddfod yn cynnal rhaglen lawn o gystadlaethau yn ddyddiol
rhwng 11.00 y bore hyd at 5.00 y prynhawn, a chystadlaethau gyda’r
nos ar y nosweithiau Llun, Mercher, Gwener a Sadwrn.
Cynhelir Eisteddfod 2007 ar faes Sioe’r Tair Sir yng Nghaerfyrddin.
Cynhelir Eisteddfod 2008 yng Nghonwy.
View in English
|
